चना के दार राजा, चना के दार रानी

छत्तीसगढ़ी व्यंग्य

चना के दार राजा,
चना के दार रानी,
चना के दार गोंदली कड़कत हे।
टुरा हे परबुधिया,
होटल म भजिया झड़कत हे।
शेख हुसैन के गाये गीत जउन बखत रेडियों म बाजिस त जम्मों छत्तीसगढिया मन के हिरदे म गुदगुदी होय लागिस। गाना ल सुनके सब झन गुनगुनावंय अउ झूमरे लागंय। सन् साठ अउ सत्तर के दसक म ये गाना ह रेडियो म अब्बड़ चलिस। वो जमाना म टी. वी. चैनल के अता-पता नइ रिहिस हे। अब रेडियो नंदाती आ गे। मोबाइल, टी. वी. चैनल अउ सी. डी. प्लेयर ह छा गे हे। रोज-रोज नवा जिनिस ह आवत हे अउ जुन्ना चीज ह बिसरावत जात हे। शेख हुसैन के ये ददरिया ल घलो अब कोनो सुरता नइ करय।
‘‘सरकार ह दस रूपिया किलो म चनादार दीही’’ ये खबर ल आजेच्च अखबार म पढ़ेंव त वो गीत के सुरता ह दनाक ले आ गे। छत्‍तीसगढ़ सरकार ह दू रूपिया किलो के चाँऊर ल पहिलिच्च देवत हे। अब दस रूपिया किलों म चनादार ह घलो मिलही। माने बारा रूपिया म रोजे तिहार होही। छत्‍तीसगढ़ म भात के संग राहेर दार, fतंवरा अउ उरिद दार जादा खाये जाथे। गुजरे जमाना म जिल्लो दार अउ कुलथी दार घलो खात रीहिन हें। फेर चनादार ल चिखना समझ के खाथें। चनादार ल निमगा नइ खावंय। अब छत्‍तीसगढिया मन ल दार अउ चिखना के सेवाद ह एके संघरा मिलही।
अब दू रूपिया के चाँऊर अउ दस रूपिया के चनादार रांध के रोज गोहगोंह ले झड़कव। सरकार ह लोगन ऊपर बड़का किरपा करे बर जावत हे। खुसी मनावव अउ मजा लव।
मंय ह शेख हुसैन के गीत ल फेर सुरता करथंव। वो ह कहिथे –

‘‘चना के दार राजा,
चना के दार रानी,
चना के दार गोंदली कड़कत हे।’’

वोकर बाद म कहिथे –
‘‘टुरा हे परबुधिया,
होटल म भजिया झड़कत हे।’’
अब सोचे के बात ये हरे कि चनादार के संग परबुधिया शब्द ह जुड़े हे। भजिया घलो चनादार के बेसन ले बनथे। चनादार, भजिया अउ परबुधिया के गजब के जोड़ बने हे। सरकार ह ठंउका सोच-विचार के चनादार ल दस रूपिया किलो म देय के योजना ल बनाय हे।
एक बेर मंय ह महाराष्‍ट्र के तीन-चार साहितकार संगवारी मन संग बइठे रेहेंव। त एक झन ह हँसी-दिल्लगी म पूछिस – ‘‘ये ग छत्‍तीसगढिया साहितकार, (वो मन मजाक म मोला अइसनेच कहंय।) तंय जानथस? महाराष्‍ट्र के बुद्धिजीवी मन बहुत हुसियार (ब्रिलियंट) काबर होथें?
मंय ह वोकर गोठ ल सुन के अकबका गेंव। थोरिक सोच के केहेंव – ‘‘देख भाऊ! मंय ह ये सुने रेहेंव कि बंगाल अउ केरल के बुद्धिजीवी मन सबले जादा हुसियार (ब्रिलियंट) होथें कहिके। फेर तंय ह महाराष्‍ट्र के मन ल कहत हस। ये ह तो मोर बर नवा बात हो गे।’’
नइ-नइ तोर जानकारी म कमी हे, छत्‍तीसगढिया साहितकार। ये ह सही बात आय, महाराष्‍ट्र के बुद्धिजीवी बहुत होसियार होथें। अब येकर कारन का हरे तउन ल सोच।’’ वो ह अपन बात म वजन डार के किहिस। ‘‘मंय ह तो नइ जानव भाऊ! तिहीं ह बता न।’’ मंय अज्ञानी बन के बोलेंव।
‘‘त सुन! महाराष्‍ट्र म चना बहुत खाये जाथे। उहाँ दैनिक भोजन म चना के व्यंजन अनिवार्य रूप म रहिथे। चना के जादा सेवन करे ले मनखे के बदन ह पुश्ट तो रहिबेच्च करथे बुद्धि ह घलो तेज बनथे। इही कारण हे।’’ वो ह खुलासा करिस।
अब मंय सोचथों! सिरतो म छत्‍तीसगढ़ सरकार ह अघात विग्यानिक हे। छत्तीसगढिया मन के बुद्धि ल तेज करे खातिर दस रूपिया किलो म चनादार देय के निरनय ले हे। ये ह तो नोबल पुरस्कार पाय के लाइक काम हरे।
शेख हुसैन के ददरिया के पहिली अंतरा ह येदइसन हे –
‘‘तरी फतोही ऊपर कुरता,
रहि-रहि के आथे तोरेच्च सुरता।’’
तरी फतोही माने कनिहा म गमछा पहिरे हे अउ ऊपर म हाफ कुरता, माने बंडी। ये खांटी छत्‍तीसगढि़या मन के तइहा जमाना के पहिरावा आय। ये ह छत्तीसगढिया मन के खास पहिचान रिहिस हे। अतकेच्च कपड़ा ल पहिर के छत्‍तीसगढि़या मनखे अपन मयारुक के सुरता ल घेरी-बेरी करत रहंय।
कुंज बिहारी चौबे ह घलो इही बात ल लिखे हे –
‘‘पहिरे बर दू बिता के पागी जी,
पिए ल चोंगी, धरे ल आगी जी,
खाए ल बासी, पिए ल पेज-पसिया,
करे बर दिन-रात, खेत म तपसिया।’’
ये ह जुन्ना बात हरे। पहिली के किसान अउ मजदूर मन दू बिता के पागी पहिरें। जुड़-जुड़ बासी अउ पेज-पसिया ल खावंय-पियंय। रात-दिन खेत म काम करंय। फेर हाथ म आगी ल जरूर धरे रहंय। अब सब बदल गे। खान-पान, पहिरावा, रहन-सहन जम्मो नवा आ गे। एमा कोनो दुख के बात नइ हे। दुख के बात ये हरे कि जम्मो पहिचान ल फेंकिन ते फेंकिन, हाथ के आगी ल घलो फेंक दिन। कम से कम हाथ के धरे आगी (ताप, गरमी, स्वाभिमान) ल तो नइ फेंकना रिहिस। चलव, जावन दव।
शेख हुसैन ह कहिथे – ‘‘रहि-रहि के आथे तोरेच्च सुरता।’’ ये ह तो मया-मयारू के गोठ आय। अब मयारू कोन ह बनही जी, तहू ल तो सोचव।
अब चना के दार देवइया ह मयारू बनही। तेकरे सेती अरथ ह अब अइसन बनही – ‘‘हे मोर राजा! (जनता) हे मोर रानी! चना ल खा के देवइया के सुरता ल राखे रहिबे। एती-वोती सुरता अउ धियान ल झन भटकाबे। छत्‍तीसगढि़या, तंय ये झन देखबे के इहां के कतका हेक्टेयर जमीन म कारखाना ठाढ़ हो गे हे। जमीन देवइया किसान मन ल सही मुआवजा मिले हे कि नइ मिले हे? कारखाना मन म कतना छत्‍तीसगढि़या मन ल पक्का काम मिले हे? यहू झन सोचबे कि पी. एस. सी. के परीच्छा के मामला ह हर बेर कोर्ट म काबर चल देथे? हर नौकरी के परीच्छा के सवाल ल गलत काबर सेट करे जाथे? स्कूल मन म गुरूजी मन के अड़बड़ कमी हे, फेर इंकर भरती ल पूरा-पूरा काबर नइ करे जाय? पढ़ेलिखे सिरतोन के छत्‍तीसगढिया बेरोजगार मन ल कतना रोजगार मिले हे? चोरीहारी, लूटपाट ह दिनोंदिन काबर बाढ़त जावत हे? ये डहर सुरता झन करबे? इंकर ऊपर सोच-विचार करना तुंहर काम नोहे। बस दू रूपिया के चाँऊर खा अउ दस रूपिया किलो के चनादार। बाकी सब सवाल ल भुला के मजा उड़ा यार।
चनादार मिलही, फेर कोन-कोन ल मिलही, अइसन fचंता झन करबे। कब मिलही तेकरो फिकर झन करबे। कइसन क्वालिटी के मिलही अउ कोन ह सप्लाई करही, अइसन बिचारे के गलती तो भूल के मत करबे। तंय तो बस लाइन लगा के अगोरा करत रह। कइसनो करके कभू मिले लगही त सेवाद ले ले के खा लेबे। खाबे अउ देवइया के सुरता ल धरे रहिबे।
शेख हुसैन जी! तुंहर ददरिया के सुरता मोला घेरीबेरी आथे। चनादार के संग परबुधिया ल जोड़े, ये ह मोला अघात सुहाथे। भाईजान! तोला सलाम हे! आदाब हे।

दादूलाल जोशी ‘‘फरहद’’

रचनाकार के जानबा

Dadulal Joshiनाव – दादूलाल जोशी ‘फरहद’
ददा – स्व.खेदूराम जोशी
दाई – स्व.पवनबाई
जन्मन – 04/01/1952
पढ़ईलिखई – एम.ए.हिन्दी पीएच.डी.
जनम जगा-गाँव फरहद पो0 सोमनी
तह. जिला-राजनांदगाँव (छ.ग.)
हुनर – कविता कहानी निबन्ध लिखना। हिन्दी छत्तीसगढ़ी दूनों म ।
सम्पादन, अभिनय, उद्घोसक।
किताब – ‘अब न चुभन देते हैं कांटे बबूल के ‘ कविता संघरा
‘आनी बानी’ भारतदेश के चउदा राजभाशा म लिखे कविता मन
के छत्तीसगढ़ी अनुवाद ।
सम्पादन – सत्यध्वज, अपन चिन्हारी, आरम्भ, पतरिका अउ किताब के।
करतब – छत्तीसगढ़ी लोक कलामंच ‘‘भुईंया के fसंगार’’ दल्लीराजहरा म
बारा बछर ले उद्घोशक अउ गम्मतिहा के कारज करें हंव ।
पेट बिकाली – 31 बछर ले बी.एस.पी.के उ.मा.विद्यालय मन म संस्कृत अउ
हिन्दी के व्याख्याता के पद म रहि के पढ़ाय हंव ं।
31 दिसम्बर 2010 के रिटायर होय हंव।
अभीन के काम धाम – गाँव म रहि के खेती किसानी अउ सोमनी के बस
स्टैण्ड म नानकुन फोटो कापी अउ कम्प्युटर टाईपिन्ग
के दुकान ।
पद – छत्तीसगढ़ हिन्दी साहित्य परिशद जिला इकाई राजनांदगाँव के
अध्यक्ष।
चिट्ठी के पता – दादूलाल जोशी द्वारा श्री अजयकुमार बर्मन वार्ड नं. 24,
पुराना सरकारी कुआं के पास नंदई चौक राजनांदगाँव
पिन – 491 441

Related posts:

Leave a Reply

Your email address will not be published. Required fields are marked *