त्रिवेणी संगम म शाही स्नान के साथ राजिम महाकुंभ कल्प के होय समापन

बिहनिया साधु-संत मन के निकली भव्य शोभा यात्रा
धर्मस्व मंत्री श्री अग्रवाल ह संगम म लगाईस डुबकी साधु-संत मन संग शोभा यात्रा मं होइस सामिल

रायपुर, 25 फरवरी 2017। छत्तीसगढ़ के प्रयागराज राजिम मं महानदी, पैरी अऊ सोंढूर नदिया मन के पवित्र संगम मं चलत राजिम महाकुंभ कल्प के कल महाशिवरात्रि पर्व म साधु-संत मन के शाही स्नान के अनुष्ठान के संग ही समापन हो गइस। नागा साधु मन अऊ आन साधु-संत मन सहित हजारों श्रद्धालु मन हर आज महाशिवरात्रि पर्व म संगम के शाही स्नान कुंड मं पावन स्नान करिन। माघ पूर्णिमा 10 फरवरी ले आयोजित राजिम महाकुम्भ कल्प के कल आखरी दिन रहिस। प्रदेश के धार्मिक न्यास अऊ धर्मस्व मंत्री श्री बृजमोहन अग्रवाल, राजिम विधायक श्री संतोष उपाध्याय, नगरपालिका गोबरा नयापारा के अध्यक्ष श्री विजय गोयल मन घलोक त्रिवेणी संगम के शाही कुंड मं डुबकी लगाईन।
संत समागम स्थल ले बिहनिया नागा साधु मन के शस्त्र पूजा के संग कई सम्प्रदा, आश्रम, अखाड़ अऊ शक्तिपीठ मन के साधु-संत अपन संस्था मन के निशानी अऊ झंडा के संग शाही स्नान शोभा यात्रा मं सामिल होइन। धर्मस्व मंत्री श्री अग्रवाल, विधायक श्री उपाध्याय अउ नगर पालिका गोबरा नवापारा अध्यक्ष श्री गोयल घलोक शोभा यात्रा मं सामिल होइन। त्रिवेणी संगम म स्थित कुलेश्वर मंदिर मं महाशिवरात्रि के विशेष पूजा के कार्यक्रम आयोजित करे गए रहिस। कुलेश्वर मंदिर मं दिन भर दर्शन बर लोगन के भीड़ लगे रहिस।
नागा साधु मन सहित आन साधु-संत मन के शोभा यात्रा लोमश ऋषि आश्रम के तीर बनाय गए संत समागम स्थल से निकलिस अउ नवापारा के नेहरू घाट ले नवा पुल होके राजिम पहुंचिस। साधु-संत राजिम मं पं. सुंदर लाल शर्मा चौक ले शास्त्री चौक होत त्रिवेणी संगम म शाही कुंड तक पहुंचिन। शोभा यात्रा मं कइ अखाड़ा, आश्रम, शक्तिपीठ अऊ संप्रदाय के साधु-संत अपन ध्वजो के संग शोभा यात्रा मं सामिल होइन। शोभायात्रा मं नागा साधु मन के दल सबले आगू चलत रहिस। बहुत अकन आश्रम अऊ अखाड़ा के प्रमुख साधु-संत घोड़ा अऊ बग्गि मन मं सवार होके शोभा यात्रा के शान बढ़ात चलत रहिन। नवापारा अऊ राजिम शहर मं लोगन मन जघा-जघा शोभा यात्रा मं सामिल साधु मन के भव्य स्वागत करिन। शोभा यात्रा मं सामिल नागा साधु मन के संग आन साधु मन अपन शस्त्र मन के संग सुघ्‍घर करतब घलोक दिखात रहिन।

Related posts:

Leave a Reply