बछरू हा एक दिन गाय जघा पूछिस
दाई सोसन काला कहिथे !
तब गाय कहिस – बेटा तैंहा जुच्छा पैरा ला,
पगुरावत रहिथस
अउ हमर मालिक हा मोर थन के दूध ला
दूह के अपन बेटा ला पियावत रहिथे
इही ला तो सोसन कहिथे !
तब बछरू हा गुसियावत कहिस
दाई ! का ये देस मा अइसन कानून नइये
जेमा हम सोसन करइया के खिलाफ लड सकन
अपन महतारी के दूध पी सकन
तब गाय कहिस – बेटा !
तैं इंहा के कानून ला नइ जानस रे !
इंहा तो जेखर हाथ मा लाठी अउ पइसा होथे
इंहा के कानून हा ओखरे बपौती होथे !
सुशील भोले
49/191 डॉ बघेल गली,
संजय नगर , रायपुर
मो. 98269 92811