Categories
समाचार

चुनाव सिरिफ दू साल दूरिहा, बजट होही लोक लुभावन





20, जनवरी, 2017 रायपुर। छत्तीसगढ़ विधानसभा के चुनाव अब सिरिफ दू साल बांचे हे। एती ए समे नवा साल के बजट बनाए बर सरकार म बइठका उपर बइठका होवत हे। बुधवार अऊ बिरसपत के दिन मुख्यमंत्री हर कई ठन विभाग मन के साहेब मन संग बइठ के ओखर बजट अउ मांग मन उपर गोठ-बात करिन।


ये समें के बजट लोक लुभावन हो सकत हे
– मुख्यमंत्री रमन सिंह हर संकेत दे हावे के ए साल 2017-18 के बजट लोक लुभावन हो सकत हे। सरकारी टैक्स कम हो सकत हे, जवान अऊ महिला मन ल राहत मिल सकत हे, संगें-संग व्यापारी मन के घलोक पूरा सुरता रखे जाही। बिरसपत के देर रतिहा एक ठन कार्यक्रम के पाछू एक सवाल के जवाब म मुख्यमंत्री हर कहिन के ए पइत के बजट बने होही, जेखर ले जनता म घलोक अच्छा संदेस जाही। आप मन जानतेच होहू के राज्‍य के वित्त विभाग के प्रभार मुख्यमंत्री तीर हे।


आन-आन विभाग मन के संग बजट म गोठ-बात करई सुरू
– बुधवार ले डॉक्‍टर साहेब ह आन-आन विभाग के मंत्री अऊ अधिकारी मन संग बजट उपर चर्चा करत हें। पहिली दिन उमन खेल अऊ स्कूल शिक्षा संग चार विभाग के मंत्री-अधिकारी मन संग बजट अउ मांग के संग जरूरत मन उपर चर्चा होइस। उहें दूसर दिन बिरसपत के दिन उमन कृषि, पंचायत-स्वास्थ्य अऊ वन विभाग के बजट उपर चर्चा करिन। जानकारी मिलत हे कि बजट समीक्षा म जमो विभाग मन जादा ले जादा बजट के मांग करत हें।