Categories
छत्तीसगढ़ी भाखा

छत्तीसगढ़ी भाषा मं लिनक्स अउ विंडोज प्रोग्राम

अडबड खुसी के बात हे कि हमर भाखा के सोर चारो मूडा बगरत हे। कम्‍प्‍यूटर म हमर भाखा के झंडा फहराए बर हमर मयारू रवि भईया हर अपन मेहनत ले छत्तीसगढ़ी भाखा मं लिनक्स अउ विंडोज प्रोग्राम रिलीज करईया हे।  सरकार चाहही त ये प्रोग्राम ले हमर गांवों गांव के पंचईत भवन अउ च्‍वाईस सेंटर मन म हमर भाखा म चलईया कम्‍प्‍यूटर लग जाही। येखर ले कम्‍प्‍यूटर के प्रोगराम मन ला समझना अउ चलाना सरल हो पाही। जादा ले जादा मनखे संचार के ये तरीका ला अपन भाखा म असानी ले समझ पाहीं।
ये संबंध म  दू ठिन रिपोट इहां ले पढे जा सकत हे  – 
मोला ओ समय सुरता आथे जब मैं हर एक होटल म बुता करंव अउ ओ समय भेलई प्‍लांट के मसीन मन ला कम्‍प्‍यूटर ले फांदे बर आस्‍ट्रेलिया के बिदेसी इंजीनियर साहेब मन मोर होटल म झोच्‍था के झोच्‍था आवैं उंखर कम्‍प्‍यूटर प्रोगराम मन जब खराब होवय त उमन ला अपन प्रोगराम मंगाये बर इंटरनेट के जरूरत परय अउ हमन हर नागपुर के एक ठन पीसियो ले इंटरनेट कांन्‍फ्रेंसिंग करावन। ऐखर खातिर ओ जर्मनी इंजीनियर के लेपटाप म डायलअप बनाए के काम मोर रहय। उंखर लेपटाप म जर्मनी भाखा के आपरेटिंग सिस्‍टम रहय, उंखर अपन देश के भाखा परेम ला  देख के मोर मन गदगद हो जावय। मैं सोंचव अइसन दिन कभू हमरो देस मा आही ………..
रवि भाई के परयास ले अब हमर भाखा हा कम्‍प्‍यूटर म छाहित होवईया हे। रवि भाई ला झंउहा झंउहां धन्‍यबाद।
रवि भाई के पसंद के राउत नाच के दोहा पारत नाचत गावत – 
अररsssss……….
जुग जुग जीवव मालिक ठाकुर जीवौ लाख बरीस रे ।
पौनी पसारी हांवन दाउ    देबोन तभो ले असीस रे ।।
संजीव तिवारी