Categories
कविता

छत्तीसगढ़िया भाव जगाए मं, काबर लजाथन?

भारत ल मदर इंडिया कइथन, भारत माता मं काबर लजाथन?
छत्तीसगढ़ मं हमन रइथन, छत्तीसगढ़-महतारी कहे मं काबर लजाथन?
छत्तीसगढ़ के अनाज सबे खाथन, जय छत्तीसगढ़ कहे मं काबर लजाथन?
दूसर ल सनमान सबे करथन, दाई-ददा के पांव छुए म काबर लजाथन?
दाई ल मम्मी कइथन, दाई कहे म काबर लजाथन?
ददा ल डैडी कइथन, ददा कहे म काबर लजाथन?
कका ल अंकल कइथन, कका कहे म काबर लजाथन?
काकी ल आंटी कइथन, काकी कहे म काबर लजाथन?
अंगरेजी म सान से गोठियाथन, छत्तीसगढ़ी बोले म काबर लजाथन?
हाय-हलो सनमान से कहिथन, जय जोहार कहे म काबर लजाथन?
कुर्सी-टेबल म बइठके खाथन, पिढ़वा म बइठके खाए म काबर लजाथन?
स्वीमिंग-पूल म भले नहाथन, तरिया-नदिया में नहाए मं काबर लजाथन?
आनी-बानी के धंधा करथन, खेती-किसानी करे म काबर लजाथन?
जांगर-टोर के महिनत करथन, अपन अधिकार लेहे म कबार लजाथन?
रातभर टीवी देखत रइथन, गियान के बात सुने म काबर लजाथन?
रातदिन कतको घूमत रइथन, रोज योग करे म काबर लजाथन?
चटर-पटर चटपटा खाथन, मउसमी फल खाए मं काबर लजाथन?
घटर-घटर चहा पीथन, दूध-दही पिए मं काबर लजाथन?
चुगलखोरी म दिन गुजारथन, अपन ल सुधारे म काबर लजाथन?
बइठे-ठाढ़े भासन झाड़थन, कुछु मेहनत करे म काबर लजाथन?
आपस के लड़ाई म काय पाथन, छत्तीसगढ़ के बड़ई करे मं काबर लजाथन?
झूठ बोले मं धोखा खाथन, सच ल सच्ची बोले मं काबर लजाथन?
लफंगा के संगति मं सब बिगड़थे, भले-मनखे के संगत मं काबर लजाथन?
कतको झन सब जात ल जुझवाथे, फुट-करइया ल हड़काए मं काबर लजाथन?
छत्तीसगढ़ मं उपज अउ खदान भरे हे, एकर रक्छा करे म काबर लजाथन?
छत्तीसगढ़ मं सोसन अउ अइताचार बढ़े हे, एकर ले जुझे मं काबर लजाथन?
छत्तीसगढ़िया सबके सनमान करथें, अपन सभिमान राखे मं काबर लजाथन?
जात-संगठन ले ऊपर उठके, छत्तीसगढ़िया-अस्मिता बचाए म काबर लजाथन?
छत्तीसगढ़िया के संस्कार एक हे, सबो जात के एकता लाए मं काबर लजाथन?
हमर सबके भासा एक हे, छत्तीसगढ़िया भाव जगाए म काबर लजाथन?

श्यामनारायण साहू ‘स्याम’
चटर्जी गली नया सरकंडा
बिलासपुर