Categories
गुड़ी के गोठ

डबरी झन बनय डबरा – गुड़ी के गोठ

आधुनिकता के चकाचौंध म चौंधियाये हमन जेन गति ले अपन परम्परा, संस्कृति अउ जीवन जीए के ढंग ल बिसरावत जावत हवन, उही गति ले कई किसम के समस्या घलोक हमर मन के आगू म अभरत जावत हवय। चाहे वो विकास के बात होवय ते सुख- समृद्घि के जम्मो म एकर पाछू विनास अउ पीरा के आरो मिल जाथे।
आधुनिकता के नाव म जबले हमन अंध औद्योगीकरण ल बढ़ावा दिए हवन तबले खेती-किसानी, जंगल-झाड़ी, डोंगर-पहार अउ तरिया-नंदिया मन के दुरगत मातगे हवय। हमर जानती म छत्‍तीसगढ़ म 60 ले 70 इंच तक बरसा होवय। असाढ़-सावन म कतकों पइत अइसन होवय के झड़ी-झखर के सेती हफ्ता-हफ्ता भर तक सुरज नरायण के दरसन मुसकुल हो जाय। जम्मो नंदिया-नरवा मन म बइहा पूरा अउ उड़ेरा पूरा आ जावय। जिहां के मनखे तिहें सुकुरदुम सपटे रहि जाय। फेर आज के पीढ़ी ”झड़ी-झखर” काला कहिथे तेनो ल बने गतर के नइ जान पावत हे। एकर कारन आय-बरसा के कमतियाना अउ वोकर कारन हे पर्यावरण के विनास। जेन छत्‍तीसगढ़ के अस्सी प्रतिशत भू-भाग म कटाकट जंगल रिहीसे जिंहा के मैदानी भाग के गांव मन म तको जंगल मुंहा झबड़ी अउ खेत के मेड़ मन रिहीन हें, उहां अब चारों मुड़ा उजार बरोबर नजारा दिखथे।
इही सबला देख-सुन के प्रदेश सरकार के चेत ह अब थोरिक जागे अस लागत हे, एकरे सेती अक्ती के दिन ले पूरा राज भर के तरिया-नंदिया मन के कोड़ई-खनई के बुता चालू करे गे हवय। ए अच्छा बात आय के बरसा के पानी ल चारों मुड़ा ले रोके-छेंके के बेवस्था करे जाय। फेर मोला लागथे के बरसा के कम होवत मात्रा ल बढ़ाए के घलोक उदिम करे जाय। अउ अइसन तभे हो सकथे जब औद्योगिक प्रदूषण ल कम कर के पर्यावरण संरक्षण के बुता ल आगू बढ़ाए जाय।
मोला अइसे लागथे के अइसन जम्मो किसम के बुता खातिर सिरिफ सरकार के मुंह ल देखना बने बात नोहय। एकर खातिर जनता ल घलोक अपन सख भर उदिम करे बर लागही। काबर ते अइसन कतकों पइत देखे गे हवय, जब सरकार तो अपन बुता ल करथे, फेर जनता के सहयोग अउ चेतना के अभाव म वो बुता ह अपन लक्ष्य ल पाए नइ सकय। छत्‍तीसगढ़ के पहिली कांग्रेसी सरकार के बखत जेन ”जोगी डबरी”के नाव म अभियान चलाए गे रिहीसे वोकर दुरदशा ल जम्मो प्रदेश देखे हे। जे किसान मन अपन-अपन खेत म जोगी डबरी बनवाए रिहीन हें, उहू मन अब बो ”डबरी” ल ”डबरा” बना डरे हें, जबकि उन चाहतीन त ‘डबरी’ ल बड़का रूप देत ‘तरिया’ के आकार दे सकत रिहीन हें। कहूं वो बखत चालू करे गे ‘डबरी’ अभियान ल आज तक चालू रखे गे रहितीस त आज जेन भू-जल स्तर अउ पर्यावरण के चिंताजनक रूप देख जावत हे वइसन देखे ले कम से कम अभी तो नइ मिलतीस।
सुशील भोले
41191, डॉ. बघेल गली
संजय नगर, टिकरापारा, रायपुर

One reply on “डबरी झन बनय डबरा – गुड़ी के गोठ”

Comments are closed.