मुख्यमत्री हर करिस डॉ. भीमराव अम्बेडकर के प्रतिमा के अनावरण
दुर्ग, 19 जनवरी 2017। मुख्यमत्री डॉ. रमन सिंह हर कहिन के समाज म जऊन सबसे गरीब हावे उही मनखे मन सरकार के सबसे करीब हावंय। सरकार के पूरा ध्यान इन गरीब मन ल ऊपर उठाके समाज म सम्मानजनक जघा देवाना हे। भारत रत्न डॉ. भीमराव अम्बेडकर हर संविधान म गरीब मन के उत्थान ल सरकार मन बर सर्वोच्च प्राथमिकता बताए हवंय। मुख्यमत्री डॉ. सिंह आज संभागीय मुख्यालय दुर्ग म जिला कलेक्टोरेट परिसर म डॉ. भीमराव अम्बेडकर के आदमकद प्रतिमा के अनावरण के बाद आयोजित सभा ल सम्बोधित करत रहिन। समारोह के अध्यक्षता राज्य सरकार के राजस्व अउर आपदा प्रबंधन मत्री श्री प्रेमप्रकाश पाण्डेय हर करिन। समारोह के आयोजन छत्तीसगढ़ बौद्ध महापंचायत अउर बोधिसत्व महिला मण्डल ह करे रहिन।
माई पहुना डॉ. रमन सिंह हर जनता ल सम्बोधित करत कहिन के भारत रत्न डॉ. भीमराव अम्बेडकर हर नियम-नीति अऊ संविधान निर्माण के संगें-संग समाज म व्याप्त सामाजिक कुरीती, अस्पृश्यता, छूआछूत, सामाजिक भेदभाव ल भुलाके आपसी भाई-चारा, सामाजिक सद्भाव, सामाजिक सौहार्द्र के संग रहे के प्रेरणा देहे हे। उमन अपन पूरा जीवनकाल समाज म व्याप्त बुराई मन ल दूर करे के संग स्वाभिमान ले जीये के मार्ग प्रशस्त करिस। डॉ. भीमराव अम्बेडकर करोड़न मनखे के आशा अऊ विश्वास के चिनहा आए। भेदभाव रहित समाज निर्माण के रद्दा उमन देखाए हें। मुख्यमत्री जी ह कहिन के डॉ. भीमराव अम्बेडकर गरीबी ले ऊपर उठके आत्म विश्वास के संग जादा ले जादा शिक्षा प्राप्त करके समाज के हर तबका के कल्याण बर काम करिस। वो कोनो एक समाज तक सीमित नइ रहिन भलुक पूरा दुनिया बर महामानव अऊ मसीहा के समान रहिन। ऊंखर विचार कालजयी हे। ऊंखर विचार, सोच अऊ कल्पना ले समाज म विकास होवत हे। ये देश मोर ये, इहां के माटी अऊ पानी मोर ये, अइसन विचार अऊ भाव रखके समाज अऊ देश बर कुछ करे के जज्बा पैदा करइया विचारक रहिन डॉक्टर भीमराव। मुख्यमत्री हर कहिन के डॉ. भीमराव अम्बेडकर के प्रतिभा के खातिर उनला, पहिली मंत्री मत्रीमण्डल म कानून मत्री जइसन बड़का पद म आसीन होए के मौका मिलीस। उमन म अद्भूत प्रतिभा रहिस, अपन प्रतिभा के दम म उमन बहुत अकन महत्वपूर्ण पद मन म काम कर सकत रहिन फेर उमन संघर्ष के राह चुनके समाज के कल्याण के रद्दा अपनाइन।
उमन आगू कहिन के डॉ. भीमराव अम्बेडकर के कल्पना के अनुसार छत्तीसगढ़ राज्य अंत्योदय के कल्याण बर काम करत हे। आखरी लकीर के आखिरी मनखे ल अधिकार मिले, अइसन सोंच के, उन मनखे मन ल चिन्ह-चिन्ह के ऊंखर कल्याण खातिर काम करे जात हे। उमन सरकार के 13 साल के कार्यकाल म लोगन के मिले समर्थन अउ विश्वास खातिर आभार प्रकट करत सबके अभिनंदन करिन।
कार्यक्रम के अध्यक्षता करत राजस्व अउ उच्च शिक्षा मत्री श्री प्रेम प्रकाश पाण्डेय हर कहिन के दुर्ग जिला मुख्यालय म डॉ. भीमराव अम्बेडकर के प्रतिमा के अनावरण होए ले बहुप्रतिक्षित मांग के सपना साकार होय हे। उमन कहिन के कार्यपालिका, न्यायपालिका अऊ व्यवस्थापिका तीनों ल समान रूप ले नियंत्रित करइया संविधान बनइया डॉ. भीमराव अम्बेडकर के प्रतिमा हमन ल अपन दायित्व अऊ कर्त्तव्य मन के उत्तरदायित्व खातिर प्रेरित करत रहिही। उमन कहिन के डॉ. भीमराव अम्बेडकर संपूर्ण मानव समाज के मसीहा रहिन, जे मन समाज के जम्मो वर्ग के मनखे ल अंगोए के काम करिन। दुर्ग नगर निगम के महापौर श्रीमती चंद्रिका चन्द्राकर हर घलोक लोकार्पण कार्यक्रम ल सम्बोधित करिन। स्वागत भासन महाराष्ट्र के विधायक श्री जोगेन्द्र कवाड़े हर दीन। कार्यक्रम म महिला अउ बाल विकास मंत्री श्रीमती रमशीला साहू, राज्यसभा सांसद श्री भूषण जांगड़े, अहिवारा विधायक श्री सांवला राम डाहरे, जिला पंचायत के अध्यक्ष श्रीमती माया बेलचंदन, पूर्व मत्री श्री हेमचंद यादव, बौद्ध महा- पंचायत के श्री भगवान दास जामुलकर, बोधीसत्व महिला मण्डल के अध्यक्ष श्रीमती नीरा प्रकाश बोरकर के संगें-संग बौद्ध समाज के हजारों के संख्या म सम्मानीय नागरिक उपस्थित रहिन।