- मुख्यमंत्री सामिल होइस अंत्योदय विकास-आवास मेला मं
- राज्य मं 54 लाख परिवार ल आबादी पट्टा के वितरण शुरू
- डॉ. रमन सिंह हर दीस एक हजार परिवार ल आबादी पट्टा
- प्रधानमंत्री आवास योजना मं तीन हजार परिवार ल मकान स्वीकृति पत्र
- पांच हजार ले जादा महिला मन ल मुफ्त रसोई गैस कनेक्शन
- अंदाजन 176 करोड़ के निर्माण कार्य के लोकार्पण-भूमिपूजन
- पलारी मं उप पंजीयक कार्यालय अऊ बलौदाबाजार मं बायपास रोड के घोषणा
- पलारी के 700 साल जुन्ना ऐतिहासिक तालाब के होही सौंदर्यीकरण
रायपुर, मुख्यमंत्री डॉ. रमन सिंह ह कहिस हे कि जनता के बेहतरी बर योजना बनाए अऊ ओला अमल करे बर इच्छा शक्ति के जरूरत होथे। हमर योजना दिल ले बनथे अऊ मानवीय संवेदना के अनुरूप होथे, जऊन दिल ल दिल ले जोड़थे। डॉ. सिंह आज शाम बलौदाबाजार-भाटापारा जिला के विकासखंड मुख्यालय पलारी मं विशाल जनसभा ल सम्बोधित करत रहिन। मुख्यमंत्री उहां अन्त्योदय विकास अउ आवास मेला मं घलोक सामिल होइन।
स्टेडियम मं आयोजित जनसभा मं उमन कहिन के अंदाजन साठ लाख गरीब परिवार ल मात्र एक रूपए किलो मं चांउर, हर एक कुटुंब ल पचास हजार रूपया तक स्वास्थ्य बीमा के सुविधा जइसे योजना मन छत्तीसगढ़ सरकार के मानवीय संवेदना ले परिपूर्ण नीती मन के उदाहरण हे। राज्य ह वो परिवार ल आबादी जमीन के पट्टा देवत हे, जऊन पाछू कई पीढ़ी ले अपन पुश्तैनी घर मं निवास तो करत हें, फेर जेमन ल अभी तक ओ आवासीय जमीन के पट्टा नइ मिल सके हे। सरकार कोति ले अंदाजन 54 लाख परिवार ल पट्टा दे जाही, जेखर वितरण शुरू हो गए हे। डॉ. सिंह हर ए कार्यक्रम मं जिला के अंदाजन एक हजार परिवार ल आबादी जमीन के पट्टा घलोक दीन। उमन अंदाजन तीन हजार परिवार ल प्रधानमंत्री ग्रामीण आवास योजना के तहत मकान स्वीकृति पत्र के वितरण तको करिन।
मुख्यमंत्री हर पलारी मं अंदाजन 176 करोड़ रूपए के 105 निर्माण कार्य के लोकार्पण अऊ भूमिपूजन करिस। उमन उहां प्रधानमंत्री उज्ज्वला योजना के तहत जिला के पांच हजार 286 गरीब परिवार के महिला मन ल मात्र दू सौ रूपया के पंजीयन शुल्क म निःशुल्क रसोई गैस कनेक्शन अऊ पहिली सिलेण्डर सहित डबल बर्नर चूल्हा के घलोक वितरण करिन। उमन जनसभा ल सम्बोधित करत विकासखण्ड अऊ तहसील मुख्यालय पलारी मं उप पंजीयक कार्यालय के स्वीकृति प्रदान करिन अऊ जिला मुख्यालय बलौदाबाजार मं दू किलोमीटर बायपास रोड बनवाए के घलोक घोषणा करिन। उमन पलारी के 700 साल जुन्ना ऐतिहासिक तालाब के सौंदर्यीकरण के घलोक ऐलान करिन।
डॉ. रमन सिंह हर कहिन के प्रधानमंत्री श्री नरेन्द्र मोदी हर देश के गरीब परिवार के पांच करोड़ महिला मन ल रसोई घर के धुंगिया ले होवइया परेशानी ल ध्यान मं रखके उज्ज्वला योजना के शुरूआत करे हे। पहिली कभू कोनो ह ए बारे मं सोचे घलोक नइ रहिस। डॉ. सिंह हर एहू कहिन के ए योजना मं सिरिफ दू सौ रूपए के पंजीयन शुल्क म हर एक कुटुंब के महिला ल निःशुल्क रसोई गैस कनेक्शन, डबल बर्नर चूल्हा अऊ पहला सिलेण्डर मुफ्त दे जावत हे। राज्य सरकार ह सौर सुजला योजना के शुरूआत तको कर दे हे। एखर तहत 51 हजार किसान मन ल काफी कम कीमत म सोलर सिंचाई पम्प दे जात हे। मुख्यमंत्री ह कहिन के बलौदाबाजार-भाटापारा नवा जिला हे। साल 2012 मं ए जिला के निर्माण करे गए रहिस। सिरिफ पांच साल के कम समें मं ए जिला मं विकास के बहुत अकन काम होए हे अऊ होवत हे। गांव मन मं सीमेंट कांक्रीट सड़क के निर्माण करे गए हे। गौरवपथ बनाए जावत हे। जनता के सुविधा बर हर प्रकार के काम इहां करे जावत हे।
मुख्यमंत्री ह ए अवसर म 71 करोड़ 52 लाख रूपया के नवा स्वीकृत 61 निर्माण कार्य के भूमिपूजन अऊ शिलान्यास, 52 करोड़ रूपया के पूरा होए 44 निर्माण कार्य के लोकार्पण करिस। ओ मन ए कार्यक्रम मं सरकार के कई ठन योजना के तहत 18 हजार ले जादा परिवार ल अनुदान सामान अऊ चेक आदि के वितरण करिस। उमन एक हजार परिवार ल आबादी जमीन के पट्टा घलोक दीन। डॉ. सिंह हर सौर-सुजला योजना के तहत एक सौ किसान मन ल 4 करोड़ रूपये के सोलर सिंचाई पम्प दीन। विधानसभा अध्यक्ष श्री गौरीशंकर अग्रवाल, खाद्य मंत्री श्री पुन्नूलाल मोहले, जांजगीर के लोकसभा सांसद श्रीमती कमला देवी पाटले, भाटापारा के विधायक श्री शिवरतन शर्मा, बलौदाबाजार के विधायक श्री जनक राम वर्मा, बिलाईगढ़ के विधायक श्री सनम जांगड़े अऊ जिला पंचायत अध्यक्ष श्रीमती पूनम मारकण्डेय सहित जिला के बहुत अकन वरिष्ठ जनप्रतिनिधि उपस्थित रहिन।
मुख्यमंत्री ह कार्यक्रम मं जिला के 99 ग्राम पंचायत ल खुले मं शौचमुक्त (ओडीएफ) घोषित होए खातिर प्रशस्ति पत्र भेंटकर के सम्मानित तको करिस। डॉ. सिंह ह ए मौका म मुख्यमंत्री कन्या विवाह योजना के अंदाजन 109 जोड़ा मन ल आशीर्वाद प्रदान करिस। डॉ. सिंह हर प्रधानमंत्री, मुद्रा बैंक योजना के तहत एक सौ हितग्राही मन ल 10 करोड़ रूपया के करजा के घलोक वितरण करिस। उमन तीन हजार हितग्राही मन ल एलईडी बल्ब घलोक दीन अऊ एक सौ किसान मन ल 16 करोड़ 50 लाख रूपया के कृषि यंत्र के संग खेती-किसानी ले संबंधित चीज मन के घलोक वितरण करिस। डॉ. सिंह हर 500 किसान मन ल स्वाईल हेल्थ कार्ड दीन। श्रम विभाग के योजना मन के तहत उमन असंगठित क्षेत्र के एक हजार 883 श्रमिक मन ल कई प्रकार के सामान आदि के घलोक वितरण करिस।