27 दिसम्बर, 2016। भारतीय जनता पार्टी ह दू बछर पाछू होवईया विधानसभा चुनाव बर अभी ले तइयारी सुरू कर देहे हे। येकरे खातिर भाजपा ह विदेश म रहईया छत्तीसगढिय़ा मन ल अपन जर ले जोरे खातिर अभियान चलाही। भाजपा के विदेश संपर्क विभाग ये उदीम म लग गए हे। विभाग एकर खातिर टेलीफोन डायरेक्टरी बनाही अउ विदेश म छत्तीसगढ़ के कलाकृती मन ल बेंचे खातिर नवा बजार खोजे के घलव उदीम करही। भाजपा विदेश संपर्क विभाग के बइठक म भाजपा यूएसए के पहिली के अध्यक्ष चंद्रकांत पटेल के अध्यक्षता म ये बड़का फैसला लेहे गईस। पटेल ह कहिन के दुनिया म हमार संस्कृतिक एकता के सम्मान हर-हमेसा रहिही। हमार जरी छत्तीसगढ़ ले जुड़े हे, येकर खातिर हमार जिम्मेदारी बनथे के, छत्तीसगढ़ ले दूरिहा सात समुदंर पार रहत अपन मन ल भाजपा ले जोरे के प्रधानमंत्री नरेंद्र मोदी के अउ सशक्त भारत सशक्त भाजपा बनाये के अभियान ल मजबूत करे जाय।
विदेश संपर्क विभाग के संयोजक अउ पूर्व मंत्री चंद्रशेखर साहू ह कहिन के विदेश म रहईया अपन मन ल छत्तीसगढ़ के माटी ले जोड़े के अभियान के शुरूआत हो गए हे। विदेश म रहइया छत्तीसगढ़ के उद्यमी, छात्र अउ एनआरआई मन ल भाजपा ले जोड़के हम समृद्धशाली छत्तीसगढ़ के परिकल्पना करत हन। ये कदम ले निवेश ल घलव बढ़ावा मिलही।