मुख्यमंत्री के अध्यक्षता म 336 करोड़ के निवेश प्रस्ताव उपर एमओयू

केन्द्र सरकार के नवरत्न कम्पनी हिन्दुस्तान पेट्रोलियम कोति ले राज्य म बनाये जाही पीओएल डिपो अउ एक निजी कम्पनी कोति ले नया रायपुर म लगाए जाही एलईडी लाईट निर्माण संयंत्र




रायपुर, 03 जनवरी 2017। मुख्यमंत्री डॉ. रमन सिंह के अध्यक्षता म आज संझा इहां मंत्रालय (महानदी भवन) म आयोजित बैठक म लगभग 336 करोड़ रूपए के पूंजी निवेश खातिर छत्तीसगढ़ सरकार के संग दू समझौता ज्ञापन (एमओयू) उपर दस्‍खत करे गीस। ये समझौता ज्ञापन मन के अनुसार भारत सरकार के सार्वजनिक क्षेत्र के नवरत्न कम्पनी हिंदुस्तान पेट्रोलियम कॉरपोरेशन (एचपीसीएल) कोति ले राज्य म पेट्रोलियम, ऑइल अउ लुब्रीकेंट (पीओएल) डिपो के स्थापना करे जाही। एकर खातिर कम्पनी कोति ले 324 करोड़ रूपया के निवेश करे जाही। बैठक म नया रायपुर के इलेक्ट्रॉनिक्स मैन्युफैक्चरिंग क्लस्टर म एलईडी लाइट बनाए के कारखाना लगाए खातिर छत्तीसगढ़ सरकार अउ निजी क्षेत्र के एक ठन कम्पनी मिलेनियम इन्फ्राटेक के बीच एमओयू होईस। ये प्रोजेक्ट उपर संबंधित कम्पनी कोति ले 12 करोड़ रूपए के पूंजी लगाये जाही। दूनों नवां परियोजना मन म अड़बड़ झन इहां के रहईया मनखे मन ल प्रत्यक्ष अउ अप्रत्यक्ष रोजगार मिलही।

हिंदुस्तान पेट्रोलियम कॉरपोरेशन (एचपीसीएल) कोति ले पीओएल डिपो जांजगीर-चांपा जिले के नया बाराद्वार रेलवे स्टेशन तीर स्थापित करे जाही। ये परियोजना 115 एकड़ म बनही जमा रेलवे स्लाइडिंग घलव शामिल हे। छत्तीसगढ़ राज्य औद्योगिक विकास निगम (सीएसआईडीसी) कोति ले आगूच ले एचपीसीएल ल 100 एकड़ जमीन आवंटित करे जा चुके हे, संगें-संग ये परियोजना खातिर अकतिहा 15 एकड़ जमीन के आबंटन एको हप्‍ता के भीतर कर दे जाही। ये डिपो के स्थापना ले राज्य के भंडार कोति ईंधन के उपलब्धता सुनिश्चित होही।




छत्तीसगढ़ सरकार कोति ले ये समझौता ज्ञापन मन उपर वाणिज्य और उद्योग विभाग के सचिव सुबोध कुमार सिंह ह, एचपीसीएल कोति ले कार्यपालन निदेशक (संचालन, विपणन और इंजीनियरिंग) अनिल पांडेय अउ मिलेनियम इंफ्राटेक कोति ले कम्पनी के निदेशक नारिंजन जिन्दल ह दस्‍खत करिन। बैठक म छत्तीसगढ़ राज्य औद्योगिक विकास निगम (सीएसआईडीसी) के अध्यक्ष छगनलाल मूंदड़ा, राज्य सरकार के मुख्य सचिव विवेक ढांड, हिन्दुस्तान पेट्रोलियम के अध्यक्ष सह प्रबंध निदेशक मुकेश कुमार सुराना, छत्तीसगढ़ सरकार के संचालक उद्योग कार्तिकेय गोयल अउ बड़े अधिकारी मन उपस्थित रहिन। हिन्दुस्तान पेट्रोलियम के अध्यक्ष सह प्रबंध निदेशक मुकेश कुमार सुराना ह बताइस के कम्पनी कोति ले लउहे छत्तीसगढ़ म घरेलू गैस सिलेंडर वाले एलपीजी बॉटलिंग संयंत्र के घलव स्थापना करे जाही।




Related posts:

Leave a Reply

Your email address will not be published. Required fields are marked *