Categories
कहानी

कहानी : मंतर

अहिल्या हॅं दुये चार कौंरा भात ल खाये रिहिस होही। ओतकेच बेरा परमिला झरफिर झरफिर करत आइस । ओरवाती के खालहे म बैठ गे। अहिल्या देखते साथ समझ गे। परमिला हॅ आज फेर अपन बेटा -बहू संग दू -चार बात कहा -सुनी होके आवत हे। अहिल्या परमिला के नस -नस ल टमर डारे हवय। जब कभू परमिला बेरा -कुबेरा अहिल्या घर आथे। थोथना फूले रहिथे। मुड़ी -चुंदी बही बरन छरियाये रहिथे। मार गोटारन कस बड़े -बड़े आॅखी ल नटेरत ,परेतीन बानी अपने अपन बुड़ुर- बुडुर करे लागथे त अहिल्या फट्ट ले जान डारथे के परमिला काकरो संग होवय लड़ झगड़ के आवत हे। आखिर परोसीन होथे। संग लगाती ससुरार आये हे। घर के मुहाटी जुरे हे। संगे रेगत हे। संगे संग उठत -बइठत हे । एके मुॅह म खावत हे एके कूला म हागत हे त का ओतको ल नइ समझही। जब कभू अइसन बात होथे त परमिला ल बइठे बर कहे ल नइ लागय। वोह खुदे हाथ- गोड़ ल लमा -पसार के बइठ जाथे अउ पसरा बगराके सुनाय लगथे। अपन राम कहानी ल। बिन संदर्भ बिन प्रसंग के । पूछे- पाछे के कोनो नेेंगे नइ राखय । आजो वोइसने होइस।

अहिल्या अॅंचोते -अॅचोवत गोठ के मुहतुर करिस -का साग खाए हस दीदी ?

हारन के बाजत भर के देरी रिहिस हे। भइगे ताहेन का पूछत हस। परमिला के रेलगाड़ी पोंपियावत छुकछुक करत दउड़े लगिस – अइ ….. का खवइ – पीयइ ल पूछथस बहिनी। खाये हवन तभो लाॅघन। नइ खाये हवन तभो लाॅंघन। अतका कहिके परमिला अपने अपन करू करू करे लगिस । मुड़ म हाथ ल रखके अनते कुती मुॅह ल करके अॅंइठत बइठ गे। जना मना अहिल्ये संग अनबन होगे हावय तइसे। मुड़ ल गड़ियायेे भीतरे भीतर आॅखी ल कनखियाके देख तको डारिस के अहिल्या हॅ कुछू बोलत हे के नही ।




अहिल्या के मुॅह उले के उले रही गे , अपने ह फेर हाथ ल झर्रावत केहे लागिस – हरहिंसा खाबे तेला खवइ कहिथे अउ उही हॅ अंग लागथे । हरहर – कटकट म काय सिध परही ।

अइ का होगेे परमिला आज कइसन गुसिया गे हावस वो ? गॅंुझियाये गाॅंठ परे फूचरा ल फरियावत अहिल्या हॅ पूछिस।

हालेके अहिल्या जानत हे के परमिला हॅ बिगर पूछे सबो बात ल उछरही । ओकर पेट म काॅही बातर नइ पचय। छेरी के मॅंुह त परमिला के मॅुह एके जान। तभो ले परमिला ल घलो तो अइसे लगना चाही के अहिल्या हॅ ओकर दुख-पीरा ल समझत – सरेखत हावय। अहिल्या के बात ह अभीन सिरायच नइ रिहिस हे –
काला बताबे ….एक ठन राहय तेला बतावॅव इहाॅं तो….. अइसे काहत परमिला फेर थोथना ल ओरमा दिस।

बइला ल धूरा पटकत देखके जइसे किसान के जी बमक जाथे तइसे कस परमिला के ओरमत थोथना ल देखके अहिल्या के जी हो गे रिहिस हे। फेर मन ल मारके उपरसाॅंसी लेवत कहिस – का करबे दीदी जिंहा चार ठन बरतन- भॅंड़वा मिलथे तिंहा ठिनिन -ठानन तो होबे करथे………..

परमिला बीचे म बात काटत कहिस -तभ्भो ले ,तभो ले। हमर घर तो बहुतेच हे। ………कुच्छूच बात नोहय।
हाथ ल झर्रारत आगू कहिस – ओकर जउंहर होवय नाती टूरा हॅं अपन ददा संग खाए बर बइठे रिहिसे। घेरी भेरी अपन दाइ जघा -आलू दे ! आलू दे कहिके माॅगय ।

ओकर आलू मॅंगइ ल देखके मही हॅ कहि परेंव – अइ आलू दे दे न वो कब के आलू आलू रटन धरे हे। ओकर थारी म भाॅटे -भाॅटा दिखत हे अउ मोर म आलूच- आलू ल भर दे हस। पीलखाहा निपोर हॅ मीठावत हे न काॅंही।
परमिला हाथ ल हला -हलाके आॅखी ल मटकावत तो गोठियाते रिहिस हे। अब मुॅह ल घलो दू बीता फार दिस अउ कहिस – हाय राम ! बहू के जबान ल तो देख , मोरे बर बघवा कस बरनियागे बाइ । मोही ल कहे लगिस -मैं छाॅंट छाॅंटकेे परोसत हॅंव का ? फोकटे फोकट मोर उपर लाॅंछन लगावत हस।

अब परमिला अपन औकात म आ गे। दाॅत ल पीसत , थूॅक ल छटकारत उल्टा अहिल्या ल पूछे लगिस -अब बता तैं भला ? अपन दाइ ददा ल अइसने जुवाब देवत रिहिस होही ?…… उहू टूरा के चाल ल तो देख। ओकरे आघू म अतेक बड़ बात होगे फेर एक भाखा बहू ल नइ बरजे सकिस। तैं कालेचुप राहा वो। दाई हॅ बने काहत हे। अतका तो कहि सकत रहिस हे। फेर काबर बोलय -ओला तो मोहनी- थोपनी देके मोह डारे हे राॅंडी़ कलजगरी हॅं।
…………………………. ।




आज ओकर ससुर जीयत रहितिस त का होतिस जानथस ?’’बखेड़ा खड़ा हो जातिस बखेड़ा’’ परमिला खुदे सवाल करथे अउ खुदे जुवाब देथे। अहिल्या कभू मुड़ी ल डोलावय। कभू हॅू -हॅू काहय। त कभू मुॅह ल ’’चक-चक’’ बजा देवय। जइसे जम्मो के जम्मो बिपत हॅ ओकरे मुॅड़ म आके खपला गे हे।

थोरिक थिराके परमिला के एक्सप्रेस फेर दउड़े लागिस। कहिस – मोर चलतिस त मैं एकर कदाप मुॅह नइ देखतेंव वो। कहाॅं कहाॅं के नीच घरायन म बिहा परेन। मै पचासो पइत ओकर ददा ल बरजे हौं। आरा -पारा , तीर -तखार ल बने पूछ -गौछके ,देख- परखके माॅगबे न कहिके। उहू मुड़पेलवा हॅं अपनेच मन के करिस। उहेंच जाके झपाइस। मोर एको नइ चलन दिस । अपन हॅ तो जुड़ा सितरा के बनौका ल बना लिस। मैं हॅ फाॅदा म परगेंव ।

उही होइस जेकर अनमान अहिल्या ल पहिलीच ले रहिस हे। गोठियाते -गोठियावत परमिला बोमफार के रोये लगिस। रोवत -रोवत परमिला अपन जम्मो पुरखाके सबो गुनदोस ल फलफल -फलफल बाॅच के ओसा तको डारिस। ले दे के सांत होइस तब जाके अहिल्या के जी जुड़ाइस।

अहिल्या जानथे के बात ल बतगंड़ बनाये के परमिला के आदतेच हे। तभो ले ओकर खाॅध म हाथ ल मड़ाके सहिलावत कहिथे – आजकाल के बहू मन ल का कहिबे बहिनी। कहिबे तेनो अनभल हे। नइ कहिबे तेनो अनभल ।




परमिला ल लागे लगिस के अहिल्या हॅ घलो मोर दुख म बियाकुल हे। ओकर ताव थोरिक जुड़ाय लगिस । जम्मो भड़ास निकल गे। मुड़ी ल नवाये सोचे लगिस। अहिल्या समझ गे के परमिला के नारी जुड़ा गे। अब लोहा म पानी मारे के बेरा आ गे।

कहिथे -बड़ेमन ल घुरूवा होयेच बर परथे परमिला । नान -नान बात म किटिर -काटर होवत रहिबो त परवार हॅ कइसे चलही। गलती काकर से नइ होवय। लइका हॅ जाॅंघ म हग देही त जाॅंघे ल थोरे काट के फेंक देबे। धोये पोंछे बर तो हमीच ल परही न !

अहिल्या जानथे के कहॅू मैं थोरको खसलेंव ताहेंन परमिला मोरे उपर चढ़ बैठही। परमिला ल समझाना माने तलवार के धार म रेगना आय।

बात ल साधत कहिस -कोन ल का कहिबे बहिनी ! हमरे घर हमरे दुवार । बनही त हमरे बिगड़ही त हमरे। कोनो हॅ अपन मन म काॅंही राखय। हमी ह अपन फरज ल निभा लेथन सोचके बेटा ल बेटा अउ बहू ल बेटी ले दूसर भाखा नइ काहन। लइका मन संग खेल खाके दुख पीरा ल बिसरा लेथॅन । फेर हाॅ ! गउकीन इमान से परमिला तैं पतिया चाहे झन पतिया । जेेन दिन ले मै बहू ल बेटी कहे ल धरे हॅव वो दिन ले सास -बहू के बीच के डबरा पटा गे हे। बेटी कस मया – दुलार ल पाके मोर सबिता हॅ बेटी ले जादा मोर हियाव करे लगे हे। मोला काॅंही के संसो फिकर नइहे। मै मन म सोंचे -सपनाये नइ राहव आगू – आगू ले मोर साध पूरा हो जाथे।

अतके ल सुनिस अउ परमिला कुला ल झर्रावत उठके मुसकावत चलते बनिस। जना -मना कोनो खचित बूता – काम के सुरता आगे।

अहिल्या सोचत देखते रहिगे -बोकबाय के बोकबाय ।

धर्मेन्द्र निर्मल
9406096346
[responsivevoice_button voice=”Hindi Female” buttontext=”ये रचना ला सुनव”]