छत्तीसगढ़ी लोक संगीत के युगपुरुष अउ लोकमंच के सबले जादा सफलतम प्रस्तुति मन मे ले एक चन्दैनी गोंदा के संचालक श्री खुमानलाल साव ल 04 अक्टूबर 2016 म राष्ट्रपति महामहिम श्री प्रणव मुखर्जी ह प्रतिष्ठित संगीत नाटक अकादमी पुरस्कार ले सम्मानित करिन। राष्ट्रपति भवन नई दिल्ली के दरबार हाल म आयोजित एक बड़का अउ मानकड़ी समारोह म राष्ट्रपति प्रणव मुखर्जी ह श्री खुमानलाल साव समेत कला के क्षेत्र म उल्लेखनीय योगदान देवईया देश के चुनिंदा 43 कलाकार मन ल संगीत नाटक अकादमी पुरस्कार ले सम्मानित करिन। ये समे म गुरतुर गोठ के संपादक घलव श्री साव जी संग राष्ट्रपति भवन म रहिन अउ सम्मान के साखी बनिन।
ये पुरस्कार म श्री खुमानलाल साव ल एक लाख रूपये के चेक, प्रशस्ति पत्र, ताम्रपत्र अउ अंगवस्त्रम देहे गईस। आप जमो मन जानत हावव के 14 बरिस के उमर ले संगीत साधना म रत श्री साव के कला यात्रा 87 वर्ष के उमर म आज ले चलत हे। छत्तीसगढ़ के समृद्धशाली लोक सांस्कृतिक परम्परा म रचे-बसे गीत मन म अउ नंदावत लोकधुन मन ल परिमार्जित करके अउ नवा कवि मन के छत्तीसगढ़ी रचना मन ल संगीतबद्ध करके उमन ल लोकप्रियता के नजर म हिन्दी फ़िल्मी गीत मन के समकक्ष खड़ा कर दीन। श्री साव के पूरा जीवन लोक संगीत ल समर्पित हे। पहिली घलोक कई ठन संस्था मन ले सम्मानित हो चुके श्री खुमानलाल साव जी प्रचार प्रसार से दूर रहि के अपन असल काम म मगन रहिथें। श्री साव ल संगीत नाटक अकादमी पुरस्कार मिले ले पूरा छत्तीसगढ़ गौरवान्वित होए हे।
दूसर दिन 05 अक्टूबर 2016 के दिन श्री खुमान लाल साव जी के चंदैनी गोंदा के कलाकार मन संगीत नाटक अकादमी के मेघदूत थियेटर म अपन प्रस्तुति दीन। खचा-खच भरे थियेटर म छत्तीसगढ़ी संस्कृति के पारंपरिक गाना मन म दर्शक मन पूरा 55 मिनट तक लगातार ताली बजावत रहिन। ये कार्यक्रम म कलाकार मन ल हबीब तनवीर के बेटी नगीन तनवीर ह सम्मानित करिन।