सुरता

गिनती, पहाड़ा, सियाही, दवात
पट्टी, पेंसल, घंटी के अवाज
स्कूल के पराथना, तांत के झोला
दलिया, बोरिंग सुरता हे मोला।
बारहखड़ी, घुटना अउ रुल के मार
मोगली के अगोरावाला एतवार
चउंक के बजरंग, तरियापार के भोला
भौंरा, गिल्ली-डंडा सुरता हे मोला।
खोखो, कबड्डी अउ मछली आस
भासा, गनित, आसपास के तलाश
एक एकम एक, चार चउंके सोला
चिरहा टाटपट्टी सुरता हे मोला।
गाय के रचना, चिखला मे सटकना
बियाम के ओखी एती ओती मटकना
अलगू, जुम्मन अउ कांच के गोला
कंडील के अंजोर सुरता हे मोला।
चोर-पुलिस,आदा-पादा
खी-मी, कुकुरचब्बा आधा
स्कूल के देरौठी बलाथे तोला
दाई-ददा के मया सुरता हे मोला।
रीझे यादव
टेंगनाबासा (छुरा)

संघरा-मिंझरा

Leave a Comment